पुणे : ‘पुणे विभागातील सर्व जिल्ह्यांच्या सात-बारा उताऱ्यांच्या संगणकीकरणाचे काम गतीने पूर्ण करावे,’ अशा सूचना महसूलमंत्री तथा पुण्याचे पालकमंत्री चंद्रकांत पाटील यांनी केल्या. पुणे विभागातील जिल्हाधिकारी व अपर जिल्हाधिकारी यांची आढावा बैठक पाटील यांच्या अध्यक्षतेखाली विभागीय आयुक्त कार्यालयातील सभागृहात पाच जुलैला झाली. त्या वेळी ते बोलत होते.
या वेळी विभागीय आयुक्त डॉ. दीपक म्हैसेकर, जमाबंदी आयुक्त एस. चोक्कलिंगम, पुणे, सातारा, सोलापूर, सांगलीचे जिल्हाधिकारी अनुक्रमे नवल किशोर राम, श्वेता सिंघल, डॉ. राजेंद्र भोसले, डॉ. अभिजित चौधरी, प्रभारी जिल्हाधिकारी नंदकुमार काटकर, अपर जिल्हाधिकारी रमेश काळे, गोपीचंद कदम, साहेबराव गायकवाड, रामचंद्र शिंदे, तसेच महसूल विभागाचे उपायुक्त प्रताप जाधव, संजयसिंह चव्हाण, अजित पवार, जयंत पिंपळगावकर आदी उपस्थित होते.
पाटील म्हणाले, ‘गौण खनिज वसुलीच्या पद्धतीत बदल होणे गरजेचे आहे. यात आवश्यक बदल सुचविण्यासाठी सोलापूरचे जिल्हाधिकारी डॉ. भोसले यांनी अन्य राज्यांच्या गौण खनिज वसुली पद्धतीचा अभ्यास करून अहवाल राज्य शासनाला सादर करावा. सातबारा संगणकीकरणाचे कोल्हापूर जिल्ह्याचे काम ८४ टक्के झाले असून, नागरिकांच्या सोयीसाठी अन्य जिल्ह्यांनीही यास प्राधान्य देऊन हे काम तात्काळ पूर्ण करावे.’
या वेळी पाटील यांनी सात-बारा संगणकीकरणांतर्गत डिजिटल सिग्नेचर पोर्टल (डीएसपी) या आज्ञावलीत कामाची सद्यस्थिती, ई-फेरफार, ऑनलाइन डाटा कम्फर्मेशन, डॉक्युमेंट स्कॅनिंग, अभिलेख कक्षाचे अद्ययावतीकरण याबरोबरच जमीन महसूल व गौण खनिज वसुली याबाबतचा आढावा घेतला.
या प्रसंगी विभागीय आयुक्त डॉ. म्हैसेकर यांनी सादरीकरण करून पुणे विभागातील कामांच्या सद्यस्थितीची तसेच कोल्हापूर क्रीडा संकुल, पंढरपूर व आळंदी विकासकामांबाबत माहिती दिली. विभागातील सर्व जिल्हाधिकारी व अपर जिल्हाधिकारी यांनी आपापल्या जिल्ह्याची माहिती सादर केली.
